Red Light Camera

၅၊ ၅၊ ၂၀၀၇

ဆိတ်ကွယ်ရာမရှိ

သားသားနားနား စာအိတ်လေး တစ်လုံး ရောက်လာလို့ ကြည့်လိုက်ပါတယ်။ ဘာတဲ့ မောင်ဂိုမာရီ မြို့နယ် ရုံးစာ ဆိုပါလား။ ကျောင်းတောင် မပြီးသေးဖူး အလုပ်ခန့်မယ့်သူက ပေါ်လာပြီထင်တယ်။ မှန်းစမ်း ဖွင့်ကြည့်စမ်းမယ်။ သြော် မောင်ဂိုမာရီ မြို့နယ်ရုံးမှာ လုပ်တဲ့ အချိန်ပိုင်း ကားဝယ်ရောင်းကိုး။ ကျုပ်ကားကို လိုချင်လွန်းလို့ ဓါတ်ပုံရိုက်ပြီး လိုက်ဝယ်တယ်ထင်ပ။ ဓါတ်ပုံကလည်း တစ်ပုံမဟုတ်ဖူး။


ဝေးဝေးကတစ်ပုံ နီးနီးကတစ်ပုံ အနီးကပ်ကတစ်ပုံ နဲ့ ၃ ပုံတောင်။ ကာလာနဲ့ဗျား။ ဒီလူ ဈေးကောင်းပေးတော့မယ် နဲ့တူတယ်။ စာဖတ်ကြည့်ဦးမှ။ ကိုရဲမွန်ခင်ဗျား . . . တဲ့။ ကြည့်စမ်းကြည့်စမ်း နာမည်တောင်သိနေသေးသကိုး။ ဒီ ဦးစ (USA) တို့ နိုင်ငံကလည်း မလွယ်ပါလား။ တယ်လီဖုန်း ခိုးနားထောင်လို နားထောင်၊ အီးမေးလ် ဖောက်ဖတ်လို ဖောက်ဖတ်နဲ့ အခု ကျုပ်ကားကို ဓါတ်ပုံ ရိုက်ရုံတင်မကဖူး နာမည်ရော လိပ်စာပါ သိကုန်ပြီ။ ဘာဆင်ခြေပေးမလဲ မသိဘူး ဆက်ဖတ်ကြည့်ဦးမှ။

"လူကြီးမင်း၏ ကားသည် မောင်ဂိုမာရီ မြို့နယ်ရှိ ၂၉လမ်း နှင့် တက္ကသိုလ် ရိပ်သာလမ်းထောင့် ရှိ မီးပွိုင့်တွင် မီးနီ ဖြတ်မောင်းသွားပါသဖြင့် ဒါဏ်ငွေ လာဆောင်ပါရန်" တဲ့။ သေဟဲ့ နန်ဒိယ။ လက်စသတ်တော့ မီးနီဖြတ်လို့ကိုး။

အမှတ်တမဲ့နဲ့ ဖြတ်မိ မီးပွိုင့်လေးပေါ်ကို x x x
( ကင်မရာက ) မမြင်ပါရင် အကောင်းသား x x x အဟောင်းများ အသစ်ဖြစ်မလာ
မြင်လာပြန်တော့ x x x တစ်မျိုးပဲ x x x ( ဒါဏ်ငွေ ) ဆောင်လိုက်ရပါပြီ။

မောင်ညီမလေးတို့လည်း လူလစ်ပြီ ဆိုပြီး မီးနီ ဖြတ်မမောင်းကြနဲ့နော်။ ယာဉ်တိုက်မှုတွေ အများဆုံးဟာ မီးနီဖြတ်မောင်းလို့ ဖြစ်ရတာတဲ့။ အခုဆို မောင်ညီမလေးတို့ရဲ့ ငွေမြို့တော် ရန်ကုန်မှာ ( ရန်ကုန် ဟာ အရင်ကတော့ ရွှေမြို့တော်ပါ အခုတော့ ကမ်းနားသစ်ပင် ဆိုသလို ရာထူးလျောပြီး ငွေမြို့တော် ဖြစ်နေပြီ ) မီးနီကင်မရာတွေ တပ်ဆင်ထားပြီ ဆိုတော့ မောင်ညီမလေးတို့ ရဲ့ ကား ဓါတ်ပုံလေးတွေ စာတိုက်ကနေ ရောက်လာနိုင်တယ်ကွဲ့။